• 1

  • 2

  • 3

  • 4

  • 5

  • 6

  • 7

  • 8

ສາມັກຄີ ມີວິໄນ ທັນສະໄໝ ໄດ້ມາດຕະຖານ

WhatsApp Image 2022 02 18 at 12.03.19 PM

ສະຖາບັນຄົ້ນຄວ້າ ວິທະຍາສາດ ການສຶກສາ (ສວສ) ກະຊວງສຶກສາ ທິການ ແລະ ກິລາ ຈັດງານພົບປະ ໃນໂອກາດ ວັນສ້າງຕັ້ງ ຄົບຮອບ 36 ປີ (20 ກຸມພາ 1986-20 ກຸມພາ 2022) ເພື່ອເປັນການ ສະເຫຼີມສະຫຼອງຜົນສຳເລັດ ໃນການເຕີບໃຫຍ່ຂະຫຍາຍຕົວ ຢ່າງມີຄຸນນະພາບ ພ້ອມທັງໃຫ້ການຍ້ອງຍໍຜົນງານແກ່ພະນັກງານຢ່າງສົມກຽດ. .

ງານພົບປະດັ່ງກ່າວ, ໄດ້ມີຂຶ້ນເມື່ອວັນທີ 18 ກຸມພາ ຜ່ານມາ ທີ່ສຳນັກງານ ສວສ, ໂດຍພາຍໃຕ້ການເປັນປະທານຂອງທ່ານ ຮສ.ປອ ພຸດ ສິມມາລາວົງ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ນາງ ປອ ສີສຸກ ວົງວິຈິດ ຄະນະປະຈຳພັກ, ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ປອ ອ່ອນແກ້ວ ນວນນະວົງ ຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ ພ້ອມດ້ວຍຄະນະ ແລະ ບັນດາຄະນະກົມທີ່ກ່ຽວຂ້ອງ, ແຂກຖືກເຊີນ, ພະນັກງານອາວຸໂສບຳນານ ຕະຫຼອດຮອດພະນັກງານ ສວສ ເຂົ້າຮ່ວມທັງເຊິ່ງໜ້າ ແລະ ລະບົບທາງໄກ.
ໂອກາດນີ້, ທ່ານ ປອ ອ່ອນແກ້ວ ນວນນະວົງ ໄດ້ກ່າວວ່າ: ສວສ ໄດ້ຮັບການສ້າງແຕ່ວັນທີ 20 ກຸມ 1986 ຕາມຂໍ້ຕົກລົງຂອງລັດຖະມົນຕີ ສສກ ເລກທີ 129/ສສ/86 ແຕ່ກ່ອນໜ້ານັ້ນ ໄດ້ມີໜ່ວຍງານ ຮັບຜິດຊອບວຽກງານນີ້ມາແຕ່ດົນນານແລ້ວ ໂດຍມີຊື່ເອີ້ນແຕກຕ່າງກັນຕາມແຕ່ລະຍຸກແຕ່ລະສະໄໝ. ສວສ ນັບວັນນັບເຕີບໃຫຍ່ຂະຫຍາຍຕົວ ປັດຈຸບັນປະກອບມີ 6 ສູນ, 2 ພະແນກ, ມີພະນັກງານທັງໝົດ 113 ຄົນ, ຍິງ 51 ຄົນ ແລະ ໄດ້ມີມູນເຊື້ອອັນດີງາມ ທັງໝົດ 5 ໜ່ວຍພັກ ທີ່ຂຶ້ນກັບຄະນະພັກຮາກຖານ ສວສ ຮັບການຢັ້ງຢືນເປັນໜ່ວຍພັກເຂັ້ມແຂງຮູ້ນຳພາຮອບດ້ານ ກໍຄື ໜ່ວຍພັກປອດໃສ ເຂັ້ມແຂງ ໜັກແໜ້ນຢ່າງຕໍ່ເນື່ອງຫຼາຍປີ, ໜ່ວຍຊາວໜຸ່ມຮາກຖານ ສວສ ໄດ້ຮັບການຢັ້ງຢືນເປັນຄະນະຊາວໜຸ່ມຮາກຖານ 4 ບຸກ, ສະມາຊິກສະຫະພັນກຳມະບານ ແລະ ແມ່ຍິງສ່ວນຫຼາຍໄດ້ກາຍເປັນບຸກຄົນດີເດັ່ນ 3 ດີຕາມຂໍ້ແຂ່ງຂັນຂອງອົງການຈັດຕັ້ງມະຫາຊົນ ຍ້ອນຜົນງານດັ່ງກ່າວ ສວສ ຈຶ່ງໄດ້ຮັບການຍ້ອງຍໍຈາກລັດຖະບານ ໂດຍໄດ້ຮັບຫຼຽນໄຊແຮງງານຊັ້ນ 2 ຈຳນວນ 3 ໜ່ວຍຢ່າງສົມກຽດ.
ນັບແຕ່ປີ 2019 ມານີ້ ຄືຫຼັງຈາກທີ່ໄດ້ຈັດງານພົບປະໃນໂອກາດວັນສ້າງຕັ້ງ ສວສ ຄົບຮອບ 33 ປີ ຍັງໄດ້ສຸມໃສ່ປະຕິບັດວຽກງານຕາມແຜນການພັດທະນາການສຶກສາ 5 ປີ ຄັ້ງທີ 8 ແລະ ຄັ້ງທີ 9, ຊຶ່ງມີຜົນສຳເລັດຫຼາຍດ້ານ ຜົນງານທີ່ພົ້ນເດັ່ນແມ່ນສຳເລັດການສ້າງຕົ້ນສະບັບຫຼັກສູດ, ປື້ມແບບຮຽນ, ຄູ່ມືຄູ ແລະ ສື່ການຮຽນການສອນຫ້ອງກຽມປະຖົມ, ຊັ້ນປະຖົມສຶກສາປີທີ 1-4, ຄະນິດສາດ ປ.5, ປື້ມຄູ່ມື ມ.1, ມ.2, ມ.5 ແລະ ຫຼັກສູດວິຊາພາສາຕ່າງປະເທດທີ່ເນັ້ນມາດຕະຖານຜົນສຳເລັດດ້ານການຮຽນ, ນຳໃຊ້ຫຼັກແບບການສອນທີ່ເນັ້ນນັກຮຽນເປັນໃຈກາງ ແລະ ເນັ້ນການປະຕິບັດຕົວຈິງ, ສຳເລັດການສ້າງຫຼັກສູດພື້ນຖານຊັ້ນປະຖົມ ແລະ ມັດທະຍົມ, ໄດ້ຄົ້ນຄວ້າຮູບແບບການຈັດການຮຽນການສອນ ເພື່ອນຳໃຊ້ໃນສະພາບທີ່ມີການແຜ່ລະບາດໂຄວິດ-19, ໄດ້ແຊກຊ້ອນເນື້ອໃນການສະກັດກັ້ນ ແລະ ຕ້ານການສໍ້ລາດບັງຫຼວງ, ຄວາມປອດໄພທາງຖະໜົນ, ການຄ້າມະນຸດ, ຄວາມເປັນພົນລະເມືອງໂລກ, ປະຊາກອນສຶກສາ, ປະຫວັດສາຍພົວພັນພິເສດລາວ-ຫວຽດນາມ, ຫວຽດນາມ-ລາວ ແລະ ເນື້ອໃນອື່ນໆເຂົ້າໃນຫຼັກສູດ, ໄດ້ປັບປຸງລະບົບການປະເມີນຜົນການຮຽນຂອງນັກຮຽນ, ປັບປຸງການອອກຫົວບົດສອບເສັງຈົບຊັ້ນທີ່ສອດຄ່ອງກັບຈຸດໝາຍຂອງຫຼັກສູດ ແລະ ຜູ້ຮຽນ.
ພ້ອມກັນນີ້, ຍັງສຳເລັດການປະເມີນຜົນການຮຽນຂອງນັກຮຽນຊັ້ນປະຖົມຂອງອາຊຽນ, ໄດ້ປັບປຸງເວັບໄຊ ສວສ ແລະ ພັດທະນາແພລດຟອມ ຄັງປັນຍາລາວ, ແອັບການຮຽນຕ່າງໆ ເພື່ອແຫຼງການຮຽນທີ່ຫຼາກຫຼາຍ, ໄດ້ອອກແບບອຸປະກອນການສຶກສາກ່ອນໄວຮຽນທາງໄກ, ກວດ ແລະ ຮັບຮອງນຳໃຊ້ປື້ມນິທານ ແລະ ປື້ມອ່ານເສີມທີ່ພັດທະນາດ້ວຍເອກະຊົນ, ໄດ້ທົດລອງອອກອາກາດລາຍການໂທລະພາບສຶກສາ ແລະ ກິລາ ຊ່ອງ 8 ລາວ ESTV ນັບແຕ່ວັນທີ 9 ພຶດສະພາ 2020 ເປັນຕົ້ນມາ, ໄດ້ຈັດການຮຽນການສອນຜ່ານທາງວິທະຍຸ ແລະ ໂທລະພາບ, ຈັດການສອນພາສາອັງກິດ ໂດຍນຳໃຊ້ວິດິໂອຈາກໂທລະພາບ ABC ອົດສະຕຣາລີ, ປັບປຸງຮູບແບບຂອງໜັງສືພິມສຶກສາ-ກິລາລາຍວັນໃຫ້ສອດຄ່ອງກັບພາລະບົດບາດໃໝ່ຂອງກະຊວງ ໂດຍປ່ຽນຊື່ເປັນໜັງສືພິມ ສຶກສາ, ວິທະຍາສາດ ແລະ ກິລາ, ນໍ້າໃຊ້ 10 ຊ່ອງທາງ ເພື່ອເຮັດວຽກໂຄສະນາຂ່າວສານໃນສື່ຕ່າງໆທີ່ຂຶ້ນ ສວສ, ໄດ້ດຳເນີນການທົດລອງການສອນພາສາຍີ່ປຸ່ນ, ພາສາຫວຽດນາມ ແລະ ພາສາເກົາຫຼີ, ສ້າງຕັ້ງສູນຄົ້ນຄວ້າພາສາລາວ ແລະ ສຳເລັດການຄົ້ນຄວ້າຮຽບຮຽງ, ຈັດພິມນໍາໃຊ້ປື້ມໄວຍາກອນລາວປັດຈຸບັນພາກອັກຂະຫຼະວິທີ, ໄດ້ຄົ້ນຄວ້າຮຽບຮຽງເອກະສານອ້າງອີງຕ່າງໆ, ຝຶກອົບຮົມຄູຝຶກ ແລະ ປະກອບສ່ວນຝຶກອົບຮົມຄູສອນ, ປະຈຳການເປັນປະຈຳ, ຜູ້ທີ່ໄປສຶກສາຕໍ່ ແລະ ຜູ້ທີ່ໄປປະຕິບັດທີ່ເຂດທ້ອງຖິ່ນຮາກຖານກໍລ້ວນແຕ່ເຮັດຫຼອນໜ້າທີ່ເປັນຢ່າງດີ.
ໂອກາດດຽວກັນ, ທ່ານ ຮສ.ປອ ພຸດ ສິມມາລາວົງ ໄດ້ກ່າວວ່າ: ຕະຫຼອດໄລຍະຜ່ານມາ ສວສ ເປັນອົງກອນໜຶ່ງທີ່ມີຄວາມເຂັ້ມແຂງ ໜັກແໜ້ນ, ສາມາດເປັນເສນາທິການໃຫ້ຄະນະນຳກະຊວງ ສສກ ໄດ້ເປັນຢ່າງດີ ໃນ 6 ໜ້າທີ່ຫຼັກຂອງຕົນ ທັງທາງດ້ານວຽກງານການພັດທະນາສື່ການຮຽນການສອນ (ສື່ສິ່ງພິມ ແລະ ເອເລັກໂຕຣນິກ), ການຄົ້ນຄວ້າ ແລະ ປະເມີນຜົນການສຶກສາ ລວມທັງການອອກຫົວບົດສອບເສັງຈົບ ມ.4 ແລະ ມ.7, ການໂຄສະນາຂ່າວສານການສຶກສາ ແລະ ກິລາ, ການສົ່ງເສີມການຮຽນພາສາຕ່າງປະເທດ ແລະ ການຄົ້ນຄວ້ານຳໃຊ້ຫຼັກພາສາລາວ, ໃນໄລຍະທີ່ມີການແຜ່ລະບາດຂອງເຊື້ອພະຍາດໂຄວິດ-19 ສວສ ເປັນກຳລັງແຮງແຖວໜ້າໃນການປະຕິບັດມະຕິຄຳສັ່ງກະຊວງ ກໍຄື ຄະນະສະເພາະກິດກ່ຽວກັບການຄົ້ນຄວ້າປັບຫຼັກສູດ, ຄົ້ນຄວ້ານຳໃຊ້ວິທີ, ຮູບແບບ ຫຼື ຊ່ອງທາງການຈັດການຮຽນການສອນ ລວມທັງໄດ້ຈັດການຮຽນທາງໂທລະພາບ ແລະ ວິທະຍຸ ກໍຄື ແນະນຳຄູກ່ຽວກັບການຮຽນການສອນທາງໄກໂດຍໃຊ້ອອນລາຍຕ່າງໆ ເຮັດໃຫ້ນັກຮຽນມີຊ່ອງທາງສືບຕໍ່ຮໍ່າຮຽນ ເຖິງວ່າໂຮງຮຽນຈະປິດຊົວຄາວກໍຕາມ ສິ່ງສຳຄັນແມ່ນ ສວສ ມີຄວາມສາມັກຄີເປັນປຶກແຜ່ນ, ມີແບບແຜນນຳພາ ແລະ ມີວິທີເຮັດວຽກທີ່ວ່ອງໄວທັນສະໄໝໃຊ້ເຕັກໂນໂລຊີ, ເຮັດແທ້ທຳຈິງ ແລະ ໄດ້ຄຸນນະພາບສູງ, ມີການພົວພັນຮ່ວມມືກັບກົມກອງ ແລະ ຄູ່ຮ່ວມພັດທະນາຕ່າງໆໄດ້ດີ ສາມາດຍາດແຍ່ງການສະໜັບສະໜູນຮ່ວມມືໄດ້ດີ.
ໂດຍ ສົງການ ພັນແພງດີ
R3.36
R2.36
R1.36